အိပ်ရေးပျက်တာများလာရင် ခန္ဓာကိုယ်ကြီး ဘယ်လိုပြောင်းလဲသွားသလဲ
လူတစ်ယောက် တစ်နေ့တာလုပ်ငန်းဆောင်တာတွေကို ကောင်းစွာလုပ်ဆောင်နိုင်ဖို့၊ ကိုယ်တွင်းအင်္ဂါတွေ လုပ်ဆောင်မှုအားကောင်းဖို့နဲ့ ကျန်းမာအသက်ရှည်စေဖို့ တစ်ရက် ညအိပ်ချိန် ၇ - ၈ နာရီလောက် ရှိဖို့ လိုအပ်ပါတယ်။ အသက်အရွယ်နဲ့ မွေးရာပါလိင်အလိုက် လိုအပ်တဲ့ အိပ်ချိန်ပမာဏ ပြောင်းလဲသွားနိုင်တယ်ဆိုပေမယ့် ပုံမှန်ယေဘုယျအားဖြင့်တော့ ညအိပ်ချိန် တစ်နေ့ (၇) နာရီရှိခြင်းကို အိပ်ရေးဝဝအိပ်စက်အနားယူတယ်လို့ သတ်မှတ်နိုင်ပါတယ်။ ဒါဆို အိပ်ရေးပျက်တယ်လို့ သတ်မှတ်လို့ရတဲ့ အခြေအနေတွေကတော့…
- လိုအပ်တဲ့အိပ်ချိန်ထက် နည်းနေတာ
- အိပ်ပျော်မှုကွင်းဆက်ကို အနှောင့်အယှက်ဖြစ်ပြီး လန့်နိုးစေတာ
- ညမအိပ်ဘဲ မနက်မှ အိပ်တာ
- အနည်းဆုံး (၂၄) နာရီခန့် ညမအိပ်ဘဲ ရှိနေတာ စတာတွေပဲ ဖြစ်ပါတယ်။
အိပ်ရေးပျက်တဲ့အခါ ခန္ဓာကိုယ်မှာ ဘာတွေ ပြောင်းလဲသွားသလဲ?
၁။ ဦးနှောက်အာရုံကြောရဲ့ လုပ်ဆောင်မှုအား သိသိသာသာကျဆင်းသွားပြီး မှတ်ဉာဏ်၊ သင်ယူလေ့လာနိုင်မှု၊ တီထွင်ဖန်တီးနိုင်စွမ်း၊ အာရုံစူးစိုက်နိုင်စွမ်းနဲ့ ဆုံးဖြတ်ချက်ချနိုင်စွမ်းတွေ မရှိတော့ဘဲ ခေါင်းမူး၊ ခေါင်းကိုက်ဝေဒနာကို ဖြစ်လာစေပါတယ် ဒါမှမဟုတ် ရှိရင်းစွဲပြဿနာကို ပိုဆိုးသွားစေနိုင်ပါတယ်။
၂။ ဦးနှောက်ရဲ့ တာဝန်တွေ လေးလံကျဆင်းလာတာနဲ့အမျှ Cortisol လို့ခေါ်တဲ့ စိတ်ဖိစီးမှုဟော်မုန်းတွေ ပိုထွက်လာပြီး လူတစ်ယောက်ရဲ့ စိတ်ခံစားချက်အပြောင်းအလဲမြန်စေတာ၊ စိတ်ဖိစီးမှုဒဏ်ကို ပိုခံရတာ၊ စိတ်ဓာတ်ကျတာ၊ မျှော်လင့်ချက်မဲ့တာ၊ စိုးရိမ်ပူပန်စိတ်၊ ကြောက်ရွံ့စိတ်တွေ ပိုဆိုးလာတာ၊ စိတ်ဆိုးဒေါသထွက်လွယ်တာ စတဲ့ စိတ်ပိုင်းဆိုင်ရာပြဿနာတွေ ဖြစ်လာနိုင်ပါတယ်။
၃။ မနက်အိပ်ရာနိုးတဲ့အခါ အိပ်ရေးပျက်ထားတဲ့အရှိန်ကြောင့် လန်းဆန်းတက်ကြွမှုမရှိဘဲ အားအင်ကုန်ခမ်းနေသလို ခံစားရမယ်၊ ဒါ့အပြင် တစ်နေ့တာလုံး မကြာခဏဆိုသလို သမ်းဝေတာ၊ အိပ်ငိုက်တာတွေ ဖြစ်နိုင်ပါတယ်။
၄။ အစာစားချင်စိတ်မရှိဘဲ ခံတွင်းပျက်သလို ခံစားရပြီး ဘာစားစား ခံတွင်းမတွေ့တာ၊ သိပ်စားမဝင်တာ၊ အစာမကြေတဲ့ ပြဿနာတွေ ဖြစ်နိုင်တဲ့အပြင် ဦးနှောက်က စိတ်ဖိစီးမှုဒဏ်ကြောင့် ကျန်းမာရေးနဲ့ မသင့်တော်တဲ့ မုန့်ပဲသရေစာ၊ အချိုမုန့်၊ အဆီအစိမ့်တွေစားချင်စိတ်ကို ပိုမိုလှုံံ့ဆော်ပေးနိုင်ပါတယ်။
၅။ မကြာခဏ အိပ်ရေးပျက်သူတွေမှာ သိသိသာသာ ပြောင်းလဲနိုင်တဲ့ ရုပ်ပိုင်းဆိုင်ရာလက္ခဏာကတော့ ကိုယ်အလေးချိန်နဲ့ ကိုယ်ခန္ဓာအချိုးအစားပါပဲ။ ပိန်တဲ့ခန္ဓာကိုယ်အချိုးအစားနဲ့ မွေးဖွားလာသူတွေမှာ အိပ်ရေးပျက်ရင် ပိုပိန်လာတတ်သလို ပြည့်ဖြိုးတဲ့ ခန္ဓာကိုယ်အချိုးအစားပိုင်ရှင်တွေကတော့ ဆန့်ကျင်ဘက်အနေနဲ့ ပိုဝလာတတ်ပါတယ်။
၆။ အိပ်ချိန်ဟာ ပျက်စီးသွားတဲ့အရေပြားဆဲလ်တွေကို ပြန်လည်ပြုပြင်ပေးတဲ့အတွက် အိပ်ရေးပျက်တာ များလာတာနဲ့အမျှ အရေပြားပေါ်မှာ ဆဲလ်အသေတွေ စုပုံလာပြီး လူကိုပိုမိုအိုမင်းရင့်ရော်စေတယ်၊ အရေးအကြောင်းတွေ ထွက်စေတယ်၊ အသားအရောင်က နဂိုကထက် မှိုင်းသွားပြီး ခရမ်းလွန်ရောင်ခြည်ဒဏ်ကို ခံရနိုင်ခြေ ပိုများသွားနိုင်ပါတယ်။
ဒါကြောင့် အသက်အရွယ်မရွေး ငယ်စဉ်ကတည်းကနေ တိကျတဲ့ အိပ်စက်မှုအချိန်ဇယားတစ်ခု သတ်မှတ်ထားပြီး ပုံမှန်အချိန်အတိုင်း အိပ်ရာဝင်လို့၊ အချိန်အတိအကျအတိုင်း အိပ်ရာကနေ နိုးထသင့်ပါတယ်။ ဒီလိုအိပ်ချိန်ဇယား သတ်မှတ်ခြင်းဟာ Insomnia လိုမျိုး ညအိပ်မပျော်တဲ့ ကျန်းမာရေးပြဿနာကို မဖြစ်လာအောင် ကာကွယ်ပေးနိုင်တဲ့အပြင် ကိုယ့်ရဲ့ကျန်းမာရေးအတွက်လည်း ရေရှည်မှာ ကောင်းကျိုးများစွာ ရှိစေနိုင်ပါတယ်။ ကိုယ့်ရဲ့ အိပ်စက်မှုအချိန်ဇယားကို တည်ဆောက်ဖို့အတွက်
- စောနိုင်သလောက် စောစောစတင်ပါ။
- ဆေးလိပ်၊ အရက်ဖြတ်ပါ။
- ကဖင်းဓာတ်ပါတဲ့ အအေး၊ အစားအသောက်တွေ စားသုံးမှုကို လျှော့ချပါ။
- ညအိပ်ချိန်နဲ့ အနည်းဆုံး ၁ နာရီခြားပြီး နောက်ဆုံးထားလို့ တီဗီ၊ ကွန်ပျူတာ၊ ရုပ်ရှင်ကြည့်တာ၊ ဖုန်းအသုံးပြုတာတွေကို ရပ်တန့်ပါ။
- နေ့လယ်ဘက်မှာ တစ်ရေးတမောအိပ်တာ ရှောင်ပါ။
- စိတ်ဖိစီးမှုကို လျှော့ချပါ။
- လေ့ကျင့်ခန်းများများလုပ်ပေးပါ။
- အစာအာဟာရကို ဂရုစိုက်ပါ။
ရဲမျိုးမြတ်